Þorsteinn um yfirtökutilboðið í Plain Vanilla: „Missi ekki svefn yfir þeirri ákvörðun“

Þorsteinn B. Friðriksson, stofnandi og framkvæmdastjóri Plain Vanilla segist ekki sjá eftir því að hafa hafnað 12 milljarða yfirtökutilboði í fyrirtækið árið 2013 nú þegar ljóst er að búið er að segja upp öllum starfsmönnum Plain Vanilla hér á landi og loka á skrifstofum þess.

„Ég missi ekki svefn yfir þeirri ákvörðun og sé alls ekki eftir henni,“ sagði Þorsteinn í viðtali við Sindra Sindrason í kvöldfréttum Stöðvar 2 í kvöld en sjá má viðtalið í heild sinni í spilaranum hér fyrir ofan.

Árið 2013 gerði tölvuleikjafyrirtækið Zynga tvö yfirtökutilboð í Plain Vanilla skömmu eftir að tölvuleikurinn Quiz Up kom á markaðinn. Naut leikurinn gríðarlegra vinsælda og lagði Zynga fram tilboð upp á 100 milljón dollara, um 12 milljarða króna. Var því hafnað ásamt öðru tilboði sem var nokkuð hærra.

Sjá einnig: Öllum starfsmönnum Plain Vanilla sagt upp

„Þegar við fengum þetta tilboð vorum við nýbúin að gefa út leikinn. Við vorum vinsælasti leikurinn í öllum heiminum,“ sagði Þorsteinn við Sindra. „Mottó fyrirtækisins var alltaf að taka mikla áhættu. Við sáum fram á það að, með því að taka mikla áhættu, hefði verðmætið getað orðið miklu meira.“

Þorsteinn viðurkenndi þó að væri honum boðin þessi upphæð núna myndi hann taka henni en áhættusæknin sem stjórnendur fyrirtækisins sýndu af sér hafi bæði orsakað ris fyrirtækisins og fall þess. Ef til vill hafi áhættusæknin þó verið of mikil.

„Fyrirtækið tók of stórar áhættur. Þessi bransi er þannig að fyrirtæki geta risið hratt og fallið hratt. Það byggist allt á ákvörðunum sem fólkið tekur. Þrátt fyrir að margar áhættur hafi borgað sig þá er sú áhætta sem er að bíta okkur í bakið núna samstarfið við NBC,“ sagði Þorsteinn.

Sjá einnig: Ris og fall Plain Vanilla: Frá „nei takk“ við tólf milljörðum til „nei takk“ frá NBC

Líkt og komið hefur fram hætti bandaríska sjónvarpstöðin við samstarf sitt við Plain Vanilla um að framleiða sjónvarpsþætti byggða á QuizUp. Nánast öll starfsemi Plain Vanilla hafi farið í undirbúning þess og því hafi það verið mikið áfall þegar NBC dró sig úr samstarfinu.

„Við vorum búin að vinna í þessu í tvö ár, eytt 36 þúsund vinnustundum. Það var allt orðið tilbúið. Við tókum áhættu þarna og lögðum öll eggin í sömu körfuna,“ sagði Þorsteinn.

„Svo fáum við þetta bréf þar sem NBC segir: Heyrðu, það gekk ekki nógu vel í Ólympíuleikunum. Við þurfum að skera niður og getum ekki framleitt þáttinn.“

Sjá einnig: Höfnuðu tólf milljarða yfirtökutilboði

Þetta hafi sett rekstrargrundvöll fyrirtækisins í hættu og því hafi þurft að segja upp öllu starfsfólki og loka skrifstofunni á Íslandi. Þorsteinn vonast til þess að þeir sem starfað hafi hjá Plain Vanilla muni nýta sér reynslu sína hjá fyrirtækinu til þess að skapa eitthvað nýtt.