Þingmaður segir það mannvonsku og martröð að senda fimm ára dreng til Noregs

Þingmenn hafa lýst yfir áhyggjum sínum af velferð fimm ára íslensks drengs sem senda á úr landi til barnaverndaryfirvalda í Noregi eftir að íslensk móðir hans var svift forræði yfir honum þar.

Ragnheiður Ríkharðsdóttir, þingflokksformaður Sjálfstæðisflokksins, lýsti áhyggjum sínum af þessu máli á þingfundi í gær og sagði að þarna væri um að ræða mannréttindamál sem Alþingi og stjórnvöld ættu að láta sig varða.  Skoraði hún á flokkssystur sína, Ólöfu Nordal innanríkisráðherra, að grípa inn í atburðarásina. En norsk barnaverndaryfirvöld sviftu foreldra drengsins forræði yfir honum áður en móðir hans fór til Íslands með hann, en faðir drengsins býr í Danmörku.

Héraðsdómur Reykjavíkur hefur staðfest að drengurinn verði tekinn úr umsjón ættingja sinnar hér á landi og fluttur í fóstur í Noregi þar sem hann á enga ættingja. Kristján Möller þingmaður Samfylkingarinnar tók undir með Ragnheiði áþingfundi í dag.

„Þar sem taka á fimm ára gamlan dreng með valdi af íslenskri ömmu sinni, móður og fjölskyldu og færa hann til Noregs í vistun næstu þrettán árin. Þar sem barnið fær að hitta móður sína tvisvar á ári í tvær klukkustundir eða fjórar klukkustundir á ári og amman sem annast hefur barniðí langan tíma fær ekkert að hitta barnið,“ sagði Kristján.

Honum sýndust norsk barnaverndarlög vera harðneskjuleg.

„Og þvílík mannvonska og þvílík refsing. Ég ætla ekki að fara yfir forsögu málsins. Móðirin lenti af lífsins leið en hefur fundið hana aftur. Ég spyr, hver er réttur barnsins,“ sagði Kristján og spurði hvort drengurinn fengi ekki að segja neitt um framtíð sína.

„Mér sýnist að í uppsiglingu sé nútíma barnarán framkvæmt af norskum barnaverndaryfirvöldum. Ég get ekki sem ríkisborgari í þessu landi og samlandi þessa fólks látið þetta óátalið og tek þess vegna þetta til umræðu á hinu háa Alþingi. Það má aldrei gerast virðulegur forseti að drengurinn verði sendur norskum barnaverndaryfirvöldum,“ sagði Kristján.

Hann undraðist að málið fluttist ekki til Íslands eftir að móðirin fór aftur heim með dregninn frá Noregi. Málið væri að snúast upp í algera martröð.

„Þetta má aldrei gerast. Virðulegi forseti, ég hef oft komið í þennan ræðustól á sautján ára þingferli mínum. Ég hef hins vegar aldrei áður fengið sting í hjartað við það að ræða mál og ég fer sorgmæddur úr þessum ræðustól,“ sagði Kristján Möller á Alþingi í dag.