WizzAir byrjar að fljúga milli Keflavíkur og Búdapest

Ungverska flugfélagið Wizz Air hefur hafið flug á milli Keflavíkurflugvallar og ungversku höfuðborgarinnar Búdapest.

Búdapest er annar áfangastaður Wizz Air frá Íslandi en félagið flýgur einnig til pólsku borgarinnar Gdansk.

Í tilkynningu frá Isavia segir að í maí næstkomandi bæti félagið þriðja áfangastaðnum við, pólsku höfuðborgina Varsjá.

„Flogið verður tvisvar í viku til Budapest, á miðvikudögum og sunnudögum, allt árið um kring. Haldið var upp á hina nýju flugleið á Keflavíkurflugvelli í gær og bauð Isavia farþegum upp á léttar veitingar í tilefni dagsins.

Wizz Air er sem áður segir ungverskt flugfélag og stærsta lággjaldaflugvélagið í Mið- og Austur-Evrópu. Félagið hóf flug á milli Gdansk og Keflavíkurflugvallar í júní í fyrra, fyrst tvisvar í viku en fjölgaði ferðum fljótlega upp í þrjár,“ segir í tilkynningunni.