Sjötíu landsliðstreyjur til sölu í Ellingsen

Ákveðið var um klukkan hálfníu í kvöld að opna verslunina Ellingsen klukkan 21 í kvöld þar sem íslensku landsliðstreyjurnar eru komnar í hús. Um sjötíu treyjur fara í sölu í versluninni í kvöld í allflestum stærðum.

„Þetta er eiginlega svona almannaþjónusta því það eru margir að fara til Frakklands á morgun og við viljum gefa þeim færi á að kaupa sér treyju áður en þeir fara út,“ segir Sölvi Snær Magnason hjá Ellingsen.

Verslunin verður opin í klukkutíma, eða til klukkan 22 í kvöld. Þá verður einnig opið hjá Jóa Útherja og Músík og sport í kvöld þar sem hægt verður að kaupa treyjuna.