Þessi hringur skiptir hann meira máli

Tyronn Lue gerði Cleveland Cavaliers að NBA-meisturum á sínu fyrsta ári sem aðalþjálfari í NBA og hringurinn sem hann fær afhentan í nótt skiptir hann miklu máli.

Það verður mikið um dýrðir í Quicken Loans höllinni í kvöld þegar NBA-deildin í körfubolta fer aftur af stað.

Leikmenn og þjálfarar Cleveland Cavaliers fá meistarahringinn afhentan fyrir opnunarleik NBA-deildarinnar á milli Cleveland Cavaliers og New York Knicks.

Tyronn Lue tók við Cleveland-liðinu af David Blatt 22. janúar 2016 og undir hans stjórn varð liðið NBA-meistari í fyrsta sinn í sögu félagsins.

Tyronn Lue vann sjálfur tvo meistaratitla sem leikmaður Los Angeles Lakers 2000 og 2001. Hann yfirgaf Lakers í kjölfarið og vann ekki titilinn með þeim sex NBA-félögum sem hann spilaði með eftir það.

Tyronn Lue er ekki í vafa um hvaða hringur mun skipta hann mestu máli. Það er NBA-hringurinn sem hann fær afhentan í kvöld.

„Hann skiptir mig meira máli vegna alls þessa sem ég þurfti að ganga í gegnum. Þegar ég vann titlana með Lakers þá bjuggust allir við að við yrðum meistarar,“ sagði Tyronn Lue.

„Núna var okkur ekki spáð titlinum og við lentum líka 3-1 undir. Við þurftum líka að komast í gegnum ýmislegt á tímabilinu sjálfu. Þess vegna skiptir þessi titill mig meira máli en hinir tveir,“ sagði Tyronn Lue.

Cleveland Cavaliers vann 27 af 41 deildarleik undir hans stjórn í fyrra (66 prósent) en 16 af 21 leik í úrslitakeppninni (76 prósent).