WOW Air nælir sér í nýjar vélar

WOW air hefur skrifað undir samning við bandarísku flugvélaleiguna Air Lease Corporation og mun flugfélagið fá þrjár nýjar farþegaþotur til viðbótar í flota sinn á næstu misserum.

Pöntunin hljóðar alls upp á fimm þotur en tvær af þessum þotum eru Airbus A320neo og Airbus A321neo.

Önnur þeirra verður afhent á fyrsta ársfjórðungi ársins 2017 og hin eftir áramót 2018. Viðhengið „NEO“ stendur fyrir „New Engine Option“ sem þýðir ný tegund hreyfla sem lækkar eldsneytisnotkun um 20% miðað við núverandi tækni segir í tilkynningu frá WOW air.

Hinar þrjár þoturnar eru einnig nýjar Airbus A321 vélar en ein þeirra, TF-GMA, var afhent núna í vikunni en TF-GPA mun afhendast í júlí. Næsta nýja Airbus A321 vél verður afhent í haust.

„Þessar nýju Airbus „NEO“ vélar eru sniðnar að okkar leiðarkerfi þar sem þær eru bæði langdrægari og sparneytnari munum við geta boðið upp á nýja áfangastaði ásamt því að halda áfram að lækka verðið enn frekar“ segir Skúli Mogensen forstjóri og stofnandi WOW air en floti WOW air verður 15 flugvélar árið 2017.