James og Curry munu standa í þjóðsöngnum

Umræðan um íþróttamenn og bandaríska þjóðsönginn heldur áfram og nú eru menn byrjaðir að spá í NBA-deildinni.

Það var leikstjórnandi San Francisco 49ers, Colin Kaepernick, sem byrjaði á því að fara niður á hné meðan þjóðsöngurinn er leikinn. Það gerir hann til þess að mótmæla lögregluofbeldi í Bandaríkjunum og kúgun svartra.

Fjölmargir hafa fylgt í kjölfarið og umræðan er afar hávær.

Það styttist í að NBA-deildin hefjist og menn farnir að spá í hvort einhverjir ætli að mótmæla þar. Í NFL-deildinni er ekki skylda að standa í þjóðsöngnum en það er aftur á móti skylda í NBA.

Bæði LeBron James og Stephen Curry hafa verið spurðir út í málið og þeir ætla að standa.

„Það þýðir samt ekki að ég virði ekki og sé sammála því sem Kaepernick er að gera. Það hafa allir rétt á því að segja sína skoðun og Kaepernick er að mótmæla eins friðsælan hátt og ég hef séð mann mótmæla,“ sagði James.

Curry hrósaði einnig Kaepernick fyrir hugrekki í að halda nauðsynlegri umræðu á lofti.