Halldór Bjarkar: Sameiginleg ákvörðun að hætta

„Þetta var samkomulag milli mín og Höskuldar [Ólafssonar, bankastjóra Arion banka],“ Halldór Bjarkar Lúðvígsson, fráfarandi framkvæmdastjóri fjárfestingabankasviðs Arion banka um starfslok sín hjá bankanum sem tilkynnt voru starfsmönnum í morgun.

„Ég var ráðinn inn í bankann hér upphaflega í janúar 2010 til að sinna þessum úrlausnarmálum og þau hafa fylgt mér alla tíð.“ segir Halldór Bjarkar og vísar þar til eigna sem Arion banka féllu í skaut í kjölfar bankahrunsins.

„Ástæðan fyrir að þetta gerist núna er á mánudaginn var tilkynnt um söluna á Bakkavör sem er eitt af stóru sem ég hef verið að sinna og þá var annað hvort að fara í önnur mál innan bankans eða breyta til og ég tók þá ákvörðun að breyta til,“ segir Halldór Bjarkar.

„Það voru kaflaskil þannig að þetta er búið að eiga sér svolítinn aðdraganda. Þegar þetta kláraðist núna var tekin sú ákvörðun að breyta til.“

Starfslokin ótengd hrunmálum

Halldór Bjarkar segir starfslok hans ótengd dómsmálum gegn fyrrum stjórnendum Kaupþings þar sem hann hefur verið lykilvitni ákæruvaldsins. Um tilviljun sé að ræða að sölunni á Bakkavör hafi lokið í sömu viku og dómur í Chesterfield málinu svokallað, gegn fyrrum stjórnendum Kaupþings, hafi verið kveðinn upp. „Þau mál tengjast þessu ekki neitt og komu aldrei til umræðu.“

Sýknudómur Héraðsdóms í því máli var kveðinn upp á þriðjudaginn. Í dómnum var Halldór Bjarkar sagður hafa verið óstöðugur í skýrslum sem hann gaf í málinu, annars vegar undir rannsókn málsins og hins vegar fyrir dómi. Hreiðar Már Sigurðsson, fyrrverandi forstjóri Kaupþings, hefur einnig Halldór Bjarkar um innherjasvik þegar hann seldi bréf í Kaupþingi fáeinum dögum áður en bankinn féll.

Halldór Bjarkar hefur ítrekað hafnað ásökunum.



Telur eignasölu hafa tekist vel

Halldór Bjarkar telur að vel hafi tekist til með að selja hluti bankans í óskyldum rekstri. „Með þessum sölum á Klakka og Bakkavör er bankinn búinn að losa sig nokkurn vegin við þau fyrirtæki sem hann endaði með eftir kreppuna 2008.  Heilt yfir held ég að þetta hafi gengið vel þó þetta hafi tekið tíma og verið erfitt.“

Sum málanna hafa verið umdeild. Bankinn seldi til að mynda 10 prósenta hlut í Símanum fyrir útboð í október á lægra verði en fékkst í útboðinu. Þá seldi Arion banki 34 prósenta hlut í Högum til félagsins Búvalla árið 2011 á 4,1 milljarð króna í opnu útboði með valrétt á 10 prósent til viðbótar sem var nýttur. Virði hlutarins hækkaði töluvert í kjölfarið og er í dag metinn á um 18 milljarða króna. Búvellir voru meðal annars í eigu fjárfestanna Árna Haukssonar og Hallbjörns Karlssonar sem voru einnig hluti af hópnum sem keypti í Símanum fyrir útboð.

Þá var Arion banki sektaður af Fjármálaeftirlitinu í desember síðastliðnum vegna sölu á hlutum í Högum í febrúar árið 2014.

Halldór Bjarkar vill ekki gefa upp um hvað taki við næst hjá honum. „Það eru tíu ár síðan ég breytti um starfsvettvang síðast þannig að það var kannski kominn tími á breytingar.“