Virðing og Kvika undirbúa samruna

Stjórnir Kviku banka hf. og Virðingar hf. hafa undirritað viljayfirlýsingu um undirbúning samruna félaganna undir nafni Kviku.

Í aðdraganda sameiningar verður eigið fé Kviku lækkað um 600 m.kr. og lækkunin greidd til hluthafa bankans. Hluthafar Kviku munu eftir samruna eiga 70 prósent hlut í sameinuðu félagi og hluthafar Virðingar 30 prósent.

Fréttablaðið greindi frá því í október að Virðing hefð lagt fram tilboð um kaup á hlut í Kviku banka með það að markmiði að fyrirtækin sameinist.

Í tilkynningu frá Kviku og Virðingu segir að með sameiningu „yrði til öflugt fjármálafyrirtæki sem væri leiðandi á fjárfestingabankamarkaði“

Þar segir einnig að á næstu vikum verði unnið að samkomulagi um helstu skilmála fyrir samrunanum, þ.m.t. um forsendur, gerð áreiðanleikakannana, endanlega samningsgerð og aðgerðar- og tímaáætlun. Ef sameining félaganna nær fram að ganga er stefnt að því að hún taki gildi um mitt næsta ár.