Jól

Laxamús á jóladag

Vera Einarsdóttir skrifar
Halldóra reynir alltaf að verða sér úti um villtan lax í músina.
Halldóra reynir alltaf að verða sér úti um villtan lax í músina. Vísir/Auðunn Níelsson
Halldóra Steindórsdóttir er með fastmótaðar jólahefðir. Hún gerir listileg piparkökuhús með barnabörnunum, sker út laufabrauð með allri fjölskyldunni og bakar að minnsta kosti sex sortir. Uppskrift að laxamús hefur fylgt henni lengi.

Halldóra býður fjölskyldunni í veislu á jóladag. Þá er yfirleitt mild laxa­mús með frísklegri sítrónusósu og ristuðu brauði í forrétt, sem bitist er um.

„Ég tók uppskriftina úr einhverju blaði fyrir örugglega tuttugu árum og hef notað hana síðan.“

Halldóra gerir músina á aðfangadagsmorgun og ber hana fram á jóladag.Vísir/Auðunn
Aðspurð segir Halldóra músina fara vel í unga sem aldna, enda laxinn mildur.

„Ég reyni helst að verða mér úti um villtan lax. Ég bý svo vel að það eru veiðimenn í fjölskyldunni. Ég á því yfirleitt flök í frysti til að grafa og gera mús. Halldóra gerir músina yfirleitt á aðfangadagsmorgun og geymir hana í ísskáp. Sömuleiðis sósuna enda segir hún hana betri daginn eftir. „Það er svo voða gott að eiga þetta tilbúið á jóladag.“

Halldóra býr á Akureyri og fer yfirleitt ásamt eiginmanni sínum í jólagraut til annars sonar þeirra í hádeginu á aðfangadag og þar hittist öll fjölskyldan. Hún fer svo í rjúpur til hins um kvöldið. Ef dóttir þeirra og fjölskylda kemur að sunnan eru þau hjónin hins vegar heima.

Aðventan er líka í föstum skorðum. „Ég bakaði alltaf nokkur piparkökuhús. Barnabörnin komu svo til að setja þau saman og skreyta. Þá hittumst við fjölskyldan undantekningarlaust til að skera út laufabrauð sem mér finnst alltaf jafn gaman.“ Halldóra er jafnframt vön að fylla alla smákökubauka og segist baka að minnsta kosti sex til sjö sortir. Hún miðar við að eiga þær allar til fyrsta sunnudag í aðventu. „Mér finnst voða gaman að hafa þetta svo til taks á aðventunni.“

Aðspurð segist hún alltaf gera piparkökur, súkkulaðibitakökur, Sörur, lakkrístoppa, hnetukökur og vanilluhringi. „Svo freistast ég nú yfirleitt alltaf til að prófa eitthvað nýtt.“



Laxamús

500 g soðinn lax (má blanda saman tveimur tegundum t.d. lúðu og silungi eða nota eina tegund af góðum fiski.)

200 g sýrður rjómi

1 dl rjómi

¼ tsk. svartur pipar, malaður

1 tsk. basilkrydd, fínmalað

1 pk. Toro fiskihlaup

3 dl heitt fisksoð

Sjóðið fiskinn í léttsöltu vatni eða mysublöndu. Leysið fiskihlaupið upp í 3 dl af sjóðandi soði og kryddið. Hrærið fiskinn vel í sundur og blandið í hlaupið ásamt léttþeyttum rjóma og sýrðum rjóma. Setjið í um það bil eins lítra mót og kælið í sex til átta klukkustundir.

Sósa

1 dós sýrður rjómi

1 lítil dós majones

¼ l þeyttur rjómi

Sítrónusafi

Smá sykur

Borið fram með ristuðu brauði.






Velkomin á Vísi. Þessi vefur notar vafrakökur. Sjá nánar.