Virðing vill Kviku banka

Verðbréfafyrirtækið Virðing hefur lagt fram tilboð um kaup á hlut í Kviku banka með það að markmiði að fyrirtækin sameinist.

Kvika varð til við sameiningu Straums og MP banka, en Virðing hafði á þeim tíma áhuga á slíkri sameiningu. Undanfarið hefur Virðing rætt við einstaka hluthafa í Kviku með það fyrir augum að kaupa hlut í bankanum. Þær þreifingar hafa nú leitt til þess að lagt hefur verið fram formlegt tilboð um kaup á hlutafé.

Góður gangur hefur verið í rekstri Kviku og sendi bankinn í gær frá sér afkomuviðvörun vegna meiri hagnaðar. Samkvæmt óendurskoðuðu uppgjöri nemur hagnaður Kviku fyrstu níu mánuði ársins rúmum milljarði króna eftir skatta. Eigið fé bankans var í lok september tæplega 6,2 milljarðar króna.