Úlfar hættir sem landsliðsþjálfari í lok ársins

Úlfar Jónsson lætur af störfum sem landsliðsþjálfari í golfi í lok ársins. Þetta kemur fram á heimasíðu GSÍ.

Auk þess að gegna starfi landsliðsþjálfara er Úlfar íþróttastjóri GKG. Hann segir að það sé erfitt að samrýma þessi tvö störf.

„Það hefur margt breyst á undanförnum fimm árum og með hverju árinu sem líður er alltaf erfiðara og erfiðara að vera í tveimur krefjandi störfum. Starfssemin hjá GSÍ er alltaf að stækka og einnig í mínu aðalstarfi sem íþróttastjóri GKG. Það eru spennandi tímar framundan á báðum vígstöðvum, en nú tel ég rétt að velja á milli og einbeita mér að öðru hvoru. GKG varð ofan á af ýmsum ástæðum,“ er haft eftir Úlfari á heimasíðu GSÍ.

Úlfar, sem hefur gegnt starfi landsliðsþjálfara frá 2011, segir mikilvægt að næsti landsliðsþjálfari verði í fullu starfi.

„Að mínu mati er GSÍ á þeim stað í dag með landsliðsstarfið að ráða þarf landsliðsþjálfara í 100% starf. Það var ekki rétti tímapunkturinn til þess að gera slíkt fyrir fimm árum þegar ég var ráðinn en ég tel að sá tími sé runninn upp,“ segir Úlfar sem vill að golfhreyfingin leiti inn á við við val á nýjum landsliðsþjálfara.

„Landsliðsþjálfari á að mínu mati að vera búsettur á Íslandi og í góðum tengslum við leikmenn. Umhverfið hefur breyst mikið frá þeim tíma þegar t.d. Staffan Johanson þáverandi landsliðsþjálfari var búsettur í Svíþjóð og kom hingað til lands með reglulegu millibili.“