Innlent

Katla minnir á sig með öflugri jarðskjálftahrinu

Sunna Kristín Hilmarsdóttir skrifar
Tæp hundrað ár eru frá því að Katla gaus síðast en öflug jarðskjálftahrina var í öskjunni í nótt.
Tæp hundrað ár eru frá því að Katla gaus síðast en öflug jarðskjálftahrina var í öskjunni í nótt. vísir/vilhelm

Öflug jarðskjálftahrina hófst norðarlega í Kötluöskjunni klukkan 01.41 í nótt. Tveir skjálftar mældust yfir fjórum stigum og var sá fyrri 4,5 stig klukkan 01:47:02 og tuttugu sekúndum síðar mælidst annar skjálfti upp á 4,6 stig. Fáeinir skjálftar voru um þrjú stig en á annan tug skjálfta hafa mælst í kjölfarið.

Gunnar B. Guðmundsson jarðeðlisfræðingur á Veðurstofu Íslands segir þetta með stærri skjálftum sem orðið hafa í Kötluöskjunni en vill ekki fullyrða um hvort að stærsti skjálftinn sem mældist í nótt sé sá stærsti sem mælst hafi í öskjunni.

„Þetta eru vissulega með stærri skjálftum sem orðið hafa í öskjunni og þetta var snörp hrina en síðan hefur dregið alveg úr þessu. Þessu fylgir ekki neinn eldgosaórói eða hlaupórói en við fylgjumst áfram með. Það má segja að Katla sé svona aðeins að minna á sig,“ segir Gunnar í samtali við Vísi.

Stærstu skjálftarnir sem urðu í nótt fundust í skálanum í Langadal en um klukkutíma áður en þessi skjálftahrina hófst urðu nokkrir skjálftar sunnar í öskjunni.  

Katla er eitt virkasta eldfjall á Íslandi auk þess sem hún er ein af stærstu megineldstöðvum landsins. Í umfjöllun um Kötlu á Vísindavefnum kemur fram að talið sé að Katla hafi gosið að minnsta kosti tuttugu sinnum síðan Ísland byggðist en síðasta stóra Kötlugos var árið 1918.

Það eru því komin 98 ár síðan eldstöðin gaus síðast en segja má að tími sé kominn á annað Kötlugos sé miðað við þann tíma sem vanalega hefur liðið á milli gosa, það er allt frá þrettán árum upp í áttatíu ár.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.