Fín veiði í Frostastaðavatni

Vötnin sunnan Tungnár eru mun minna stunduð en veiðivötn og þar eru yfirleitt fáir á ferli þrátt fyrir að þarna sé góð veiðivon.

Þau vötn sem eru mest stunduð eru Ljóti Pollur og Frostastaðavatn en silung má þó finna í fleiri vötnum.  Frostastaðavatn er aðgengilegast og því fara flestir veiðimenn þangað en það er þó nokkuð stórt vatn svo það er rúmt um alla.  Það hefur verið fín veiði í blíðunni í sumar og þá sérstaklega á björtum og hlýjum sumarkvöldum en dæmi eru um að veiðimenn hafi tekið 20-30 bleikjur á löngu kvöldi.  Mest af aflanum er 1-2 punda bleikja en þær eru alveg til þessar stóru þó þær séu tregar til að taka.  Það má oft sjá þær stutt frá landi þegar líður á sumarið og það er auðvelt að fullyrða að sumar þeirra gætu verið að ná 6-7 pundum.

Þetta er fínn tími í bleikjuvötnunum á hálendinu og um að gera fyrir þá sem eiga eftir að skella sér á hálendið með veiðistöngina að drífa í því því sumarið klárast fyrr en varir.