Bæði svæðin eru hjá Stangaveiðifélagi Reykjavíkur og nú fer að styttast í að þeir félagsmenn SVFR staðfesti sína daga á komandi sumri. Þetta er árstíminn sem veiðimenn eru að skipuleggja sig fyrir tímabilið sumarið 2023 en það má ekki seinna vera því ásókn erlendra veiðimanna til Íslands er að aukast og þeir stökkva á alla lausa daga sem eru í boði þessa dagana.
Laxá á sérstakan stað í hjarta margra veiðimanna og er það fastur liður fyrir marga að fara norður í paradísina, sumir segja að þetta sé besta urriða veiðisvæði í heiminum. SVFR skrifaði nýlega undir nýjan samning við veiðifélagið sem ber að fagna.
Með nýjum samning koma nokkrar breytingar en veitt verður á 12 stangir í Laxárdal (voru 10 áður) en óbreyttur stangarfjöldi verður í Mývatnssveit. Á síðustu árum er búið að byggja 12 fullbúin herbergi í Laxárdal með baðherbergi og sturtu inn á hverju herbergi. Það er einnig sérstaklega ánægjulegt að segja frá því að hugmyndavinna er farin af stað með stórfelldar breytingar á veiðihúsinu Hofi í Mývatnssveit.
