Hreiðar Már telur að starfsmenn sérstaks saksóknara hafi brotið gegn sakamálalögum, lögreglulögum og almennum hegningarlögum

Hreiðar Már Sigurðsson fyrrverandi forstjóri Kaupþings telur að starfsmenn sérstaks saksóknara hafi haldið mikilvægum sönnunargögnum frá honum og öðrum sakborningum í CLN-málinu svokallaða og þannig brotið gegn sakamálalögum, lögreglulögum og almennum hegningarlögum.

Að mati Hreiðars varða ætluð brot „misbeitingu opinbers valds í því skyni að ná fram sakfellingu og þar með refsingu gegn einstaklingum fyrir dómi,“ að því er segir í kæru Hreiðars til ríkissaksóknara, en greint var frá kærunni í fjölmiðlum í gær. Kæran var send í febrúar síðastliðnum en í henni er krafist að það verði rannsakað hvort starfsmenn sérstaks saksóknara hafi leynt mikilvægum gögnum í málinu.

Er þetta í þriðja sinn sem Hreiðar Már kærir starfsmenn sérstaks saksóknara en hinar tvær kærurnar sneru að símhlustunum og hlusturnarúrskurði í tengslum við Al Thani-málið. Báðar þær kærur voru felldar niður. Hreiðar afplánar nú einmitt dóm vegna þess máls á Vernd en hann var dæmdur í fimm og hálfs árs langt fangelsi í Hæstarétti í febrúar í fyrra.

Hafnar ásökunum Hreiðars Más

Ólafur Þór Hauksson héraðssaksóknari og fyrrum sérstakur saksóknari segist í samtali við Vísi lítið geta tjáð sig um kæruna þar sem CLN-málið er enn til meðferðar hjá Hæstarétti. Ólafur Þór hafnar þó öllum ásökunum um að starfsmenn embættisins hafi vísvitandi haldið gögnum frá sakborningum.

Í CLN-málinu var Hreiðar ákærður ásamt þeim Sigurði Einarssyni og Magnúsi Guðmundssyni fyrir umboðssvik vegna lánveitinga til fjögurra eignarhaldsfélaga haustið 2008 upp á samtals 510 milljónir evra til að kaupa lánshæfistengd skuldabréf af Deutsche Bank sem tengd voru skuldatryggingarálagi Kaupþings. Var markmið kaupanna að lækka skuldatryggingarálag bankans en lánin voru einnig notuð til að mæta veðköllum Deutsche vegna kaupanna þegar skuldatryggingarálag Kaupþings fór yfir ákveðin mörk.

Þremenningarnir voru allir sýknaðir í janúar síðastliðnum og byggði niðurstaða Héraðsdóms Reykjavíkur meðal annars á gögnum sem sakborningarnir fengu aðgang að með dómsúrskurði, en í dómnum segir:

„Í ákærunni í málinu er byggt á því að lánin sem ákært er út af hafi verið „veitt án trygginga”.  Ekki er að sjá að þessu mikilvæga atriði hafi verið gefinn sérstakur gaumur í rannsókn málsins.“

Farið fram á aðgang að fleiri gögnum í öllum sakamálunum

Sérstakur saksóknari höfðaði alls fjögur sakamál á hendur Hreiðari og var deilt um aðgang að rannsóknargögnum í þeim öllum. Í samtali við Vísi segir Hörður Felix Harðarson, verjandi Hreiðars Más, að í öllum málunum hafi verjendur gert kröfu um að fá aðgang að rannsóknargögnum en það var ekki fyrr en í CLN-málinu sem dómstólar féllust á að veita sakborningum aðgang að ákveðnum gögnum sem ákæruvaldið hafði ekki lagt fram.

 

„Þeir sem hafa setið þessi réttarhöld hafa eflaust tekið eftir því að ég hef hamrað á þessu en þetta hefur ýmist enga umfjöllun fengið í þessum dómum eða þá að kröfunum um aukinn aðgang að gögnum hefur verið hafnað. Svo gerist það allt í einu í CLN málinu að við fáum takmarkaðan aðgang að tveimur tölvupósthólfum tveggja viðskiptastjóra. Það tók okkur aðeins örfáar klukkustundir að finna gögn sem skiptu verulegu máli og það eru gögn sem héraðsdómur tekur upp í forsendum sínum til að rökstyðja sýknudóm,“ segir Hörður og bætir við að þetta sýni alvarleika málsins og nauðsyn þess að grundvallarreglan um jafnan aðgang aðila að gögnum sé virt.

Stórhættulegt ástand sem verður að laga

Frá því var greint fyrr í sumar að Mannréttindadómstóll Evrópu hafi krafið íslensk stjórnvöld svara um málsmeðferð Al-thani málsins. Sendar voru fjórar spurningar til yfirvalda og snýst ein spurningin um aðgang að gögnum.

„Það gefur manni vonir um að þetta hafi vakið athygli manna þarna ytra og vonandi verður einhver fókus á þetta í framhaldinu.  Að mínu viti er þetta ástand sem verður að laga því þetta er auðvitað stórhættulegt og algjörlega magnað að það skuli vera hægt að dæma í þessum málum núna án þess að það sé nokkur aðgangur að gögnum fyrir sakborninga önnur en þau sem ákæruvaldið hefur valið og það er þá engin leið til að finna út úr því hvort að öll gögn hafi skilað sér inn í málið sem skipta máli,“ segir Hörður Felix.  

Hörður Felix segist ekkert hafa heyrt frá ríkissaksóknara vegna málsins en í maí sendi hann bréf til embættisins fyrir hönd Hreiðars Más þar sem hann áréttaði kröfuna um rannsókn á starfsmönnum sérstaks saksóknara. Þá hvatti hann ríkissaksóknara til þess að falla frá áfrýjun CLN-málsins vegna annmarka sem Hreiðar telur að hafi verið á rannsókn málsins en í bréfinu kemur fram að ákæruvaldið hafi eftir sýknudóm héraðsdóms afhent verjendum endurrit 10 borðsímtala úr Kaupþingi í Lúxemborg.

Endurritin voru ekki lögð fram í héraði þar sem sérstakur saksóknari taldi þau ekki bæta neinu við önnur gögn í málinu. Í bréfinu er athygli ríkissaksóknara vakin á því að um er að ræða samtímagögn sem snúast beint um þau viðskipti sem deilt var um í CLN-málinu.