Ísland hafnaði í 16. sæti | Tap gegn Írlandi

Íslenska kvennalandsliðið í golfi hafnaði í 16. sæti á Evrópumóti kvennalandsliða í golfi eftir 3-2 tap gegn Írlandi á Urriðavelli í dag.

Anna Sólveig Snorradóttir og Berglind Björnsdóttir byrjuðu daginn vel fyrir Ísland og unnu fjórmenningsleikinn örugglega með fjórum vinningum þegar þrjár holur voru eftir.

Íslandi gekk ekki eins vel í einstaklingsleikjunum fjórum því aðeins Guðrún Brá Björgvinsdóttir hafði sigur en hinir þrír leikirnir töpuðust allir.

Guðrún Brá lék frábærlega á mótinu og tapaði ekki einum einasta leik sem verður að teljast mjög góður árangur hjá henni þó liðið hafi ekki náð þeim árangri sem vonast var til.