Innlent

Íslensk fjölskylda átti sannkallaðan draumadag í Annecy

Kolbeinn Tumi Daðason skrifar
Landsliðsmenn og framtíðarlandsliðsmenn. Frá vinstri: Margeir, Eiður Smári, Arnaldur, Aron Einar, Sverrir Ingi, Jóhann Berg og Kolbeinn.
Landsliðsmenn og framtíðarlandsliðsmenn. Frá vinstri: Margeir, Eiður Smári, Arnaldur, Aron Einar, Sverrir Ingi, Jóhann Berg og Kolbeinn.
Fimm manna fjölskylda frá Íslandi sem verið hefur á ferð og flugi um Frakkland undanfarnar tæpar tvær vikur nýtti vel eins dags heimsókn til fjallabæjarins Annecy í gær.

Ungir knattspyrnumenn hittu hetjurnar sínar í landsliðinu á förnum vegi og foreldrarnir gátu nýtt atkvæðarétt sinn í forsetakosningunum þökk sé „Bjargvættinum“ frá Vestmannaeyjum.


Arnaldur með íslenskan fána, sem nú er áritaður af landsliðsmönnum í bak og fyrir, á leiknum gegn Ungverjum í Marseille.
Einar Ásgeirsson og Olga Perla Nielsen flugu til Mílanó þann 13. júní og hafa síðan verið á ferðalagi um Frakkland. Fyrst á bílaleigubíl og síðan hefur verið ferðast í lestum.

Með í för eru synirnir Arnaldur Ásgeir og Margeir Orri, báðir miklir Þróttarar, að ógleymdum Hreiðari sex er rétt orðinn sex mánaða en var ekkert nema brosið í steikjandi hitanum í Annecy þegar blaðamaður hitti á fjölskylduna.




Fimmmenningarnir tóku lestina frá Lyon til Annecy í gærmorgun og skelltu sér í göngutúr niðri við vatnið í Annecy. Þar urðu strákarnir ungu stjörnustjarfir þegar þeir mættu engum öðrum en Eiði Smára Guðjohnsen og fleirum úr íslenska landsliðinu. Þeir voru á leiðinni í hjólatúr niðri við vatn en mjög heitt var í veðri í gær og hiti um og yfir 30 gráður.


Hreiðar Einarsson er einn yngsti stuðningsmaður íslenska landsliðsins í Frakklandi.
Einar lýsir landsliðsmönnunum sem miklum fagmönnum enda hafi þeir gefið kost á myndatöku og ekki látið sig muna um að árita bækur og fána fyrir strákana. 

Arnaldur og Margeir sáu okkar menn gera jafntefli í dramatískum leikjum bæði í Saint-Étienne og Marseille en það var allt annað þegar augun mættust. Stór stund.




Blaðamaður hitti svo á fjölskylduna um kvöldmatarleytið þegar hún var mætt á hótelið þar sem íslensku blaðamennirnir dvelja í Annecy. Þar hafði Martin Eyjólfsson, sendiherra Íslands í Genf, komið upp utanfundarkjörstað þar sem fjölmiðlamenn gátu kosið og nýttu þau Einar og Olga tækifærið og gengu til kosninga.



 

Margeir, Einar, Arnaldur, Olga og Hreiðar eftir að gengið var til kosninga í gær.Vísir/KTD
Martin hefur verið kallaður Bjargvætturinn eftir að hann bjargaði ÍBV frá falli tvö ár í röð á tíunda áratugnum með marki í lokaumferð Íslandsmótsins. Í fyrrakvöld heimsótti hann strákana á hótelið í Annecy og gaf þeim færi á að kjósa sem sumir nýttu sér, aðrir ekki.

Á meðan foreldrarnir kusu lá Hreiðar sex mánaða í kerrunni sinni og brosti út að eyrum. Engin mannafæla þar heldur sannkallaður gleðigjafi.

Eftir að hafa kosið hélt svo fjölskyldan upp í strætó niður á lestarstöð þaðan sem haldið var aftur til Lyon þar sem systir Einars býr með fjölskyldu sinni. Framundan er annað stórmót í knattspyrnu, heima á Íslandi, en Arnaldur Ásgeir er að fara að keppa með 5. flokki Þróttar á N1 mótinu. Þá var Margeir Orri í eldlínunni með 7. flokki Þróttar á Norðurálsmótinu á Akranesi á dögunum. Skammt stórra móta á milli.


Tengdar fréttir




Fleiri fréttir

Sjá meira


×