Kona nýr framkvæmdastjóri hjá FIFA

Fatma Samba Diouf Samoura frá Senegal hefur verið ráðin sem nýr framkvæmdastjóri Alþjóðaknattspyrnusambandsins FIFA en hún tekur við starfi Jerome Valcke.

Fatma Samba Diouf er 54 ára gömul og hefur unnið fyrir Sameinuðu þjóðirnar í 21 ár. Hún tekur við nýja starfinu í júní.

Jerome Valcke missti starfið sitt sem framkvæmdastjóri FIFA þegar hann var dæmdur í tólf ára bann frá fótbolta eftir að upp komst um spillingu hjá honum í þessu einu af valdamestu störfum innan alþjóðafótboltans.

Það var tilkynnt á ársþingi FIFA í Mexíóborg að Samoura hefði fengið starfið en Gianni Infantino, nýr forseti FIFA, vinnur nú að endurbyggingu sambandsins eftir fjölmörg áföll á síðustu mánuðum í tengslum við gríðarlega stór spillingarmál.

Gianni Infantino hefur meðal annars gefið það út að hann ætli að taka vel til innan FIFA og koma með fótboltann aftur inn til FIFA og FIFA aftur úr í fótboltann.

Fatma Samba Diouf er eins og er að vinna fyrir Sameinuðu þjóðirnar í Nígeríu en hún talar fjögur tungumál. Hún fær góð meðmæli og er mjög virt fyrir störf sín fyrir Sameinuðu þjóðirnar undanfarna tvo áratugi.

Fatma Samba Diouf er líka vön því að vinna fyrir samtök þar sem allt er upp á borðinu en það hefur verið boðað mun mun meira gegnsæi á starfsemi FIFA á næstunni.

Framkvæmdastjóri FIFA og KSÍ eru því báðar konur en Klara Bjartmarz hefur verið framkvæmdastjóri KSÍ síðan í mars 2015 eða í rúmt ár.