Hörður Þórhallsson nýr forstjóri Icepharma

Hörður Þórhallsson hefur verið ráðinn forstjóri heilbrigðisfyrirtækisins Icepharma. Hann tekur við starfinu af Margréti Guðmundsdóttur, sem lætur af störfum 1. júlí eftir ellefu ár í forstjórastarfinu.

Tilkynnt var í byrjun mánaðarins að Hörður myndi láta störfum sem framkvæmdastjóri Stjórnstöðva ferðamála. Í tilkynningu frá atvinnuvega- og nýsköpunarráðuneytisins kom fram að Hörður hafi verið ráðinn framkvæmdastjóri tímabundið til sex mánaða til að koma verkefninu af stað. Hann lýkur störfum þar á næstu vikum.

Hörður Þórhallsson er menntaður rekstrarverkfræðingur, útskrifaður frá háskólanum í Karlsruhe í Þýskalandi. Hörður starfaði áður hjá Actavis og vann að uppbyggingu fyrirtækisins í Asíu, Eyjaálfu, Afríku og Miðausturlöndum með starfsstöð og búsetu í Sviss og Singapúr. 

Margrét mun áfram vera í framkvæmdarstjóri og stjórnarmaður móðurfélags Icepharma, Eignarhaldsfélagsins Lyngs ehf. Þá mun Margrét sitja áfram í stjórn Lyfjaþjónustunnar og Icepharma A/S í Danmörku, sem eru félög í eigu sama eigendahóps. 

Kristján Jóhannsson, stjórnarformaður Icepharma, segir þá miklu reynslu og þekkingu, sem Hörður hafi muni nýtast félaginu til frekari sóknar og uppbyggingar.  „Félagið hefur sterka stöðu á markaði og býr að traustum viðskiptasamböndum og afburða starfsfólki.  Fyrir hönd stjórnarinnar býð ég hann velkominn til starfa og þakka Margréti fyrir farsæl og góð störf í þágu Icepharma.  Fyrirtækið hefur vaxið og dafnað undir hennar stjórn og náð mjög leiðandi stöðu á markaði.“