Hörður hættur hjá Stjórnstöð ferðamála og staðan auglýst til umsóknar

Hörður Þórhallsson er hættur sem framkvæmdastjóri Stjórnstöðva ferðamála og verður starf framkvæmdastjóra auglýst laust til umsóknar á næstunni. Þetta kemur fram í tilkynningu frá atvinnuvega- og nýsköpunarráðuneytisins þar sem greint er frá því að stjórnstöðinni er ætlað að starfa til ársins 2020 og að Hörður hafi verið ráðinn framkvæmdastjóri tímabundið til sex mánaða til að koma verkefninu af stað en hverfi nú til annarra starfa.

Ráðningar Harðar í starf framkvæmdastjóra Stjórnstöðvar ferðamála vakti mikla athygli þegar hún var tilkynnt í október síðastliðnum. Staðan var ekki auglýst þar sem ráðningin var tímabundin til sex mánaða en ýmsir héldu því fram að Hörður hefði fengið þetta starf vegna tengsla hans við Sjálfstæðisflokkinn. Hörður sagði í samtali við Vísi í október í fyrra að honum þætti sú umræða dapurleg og verið væri að gera hann tortryggilegan til að koma höggi á aðra.

Sjá einnig: „Mér finnst líklegt að ég sé skráður í Sjálfstæðisflokkinn“

Í tilkynningunni frá ráðuneytinu segir að íslenska ríkið og Samtök ferðaþjónustunnar hafi í dag formlega stofnað sérstakt sameignarfélag utan um rekstur Stjórnstöðvar ferðamála. Er nafn þess Rekstrarfélag Stjórnstöðvar ferðamála og er það í 50% eigu ríkissjóðs og 50% í eigu Samtaka ferðaþjónustunnar.

Er Stjórnstöð ferðamála sögð samráðsvettvangur, skipaður af forsætisráðherra í kjölfar þess að samkomulag var undirritað þann 6. október síðastliðinn milli ríkisstjórnar Íslands, Samtaka ferðaþjónustunnar og Sambands íslenskra sveitarfélaga um eflingu íslenskrar ferðaþjónustu til ársins 2020.

Stjórnstöð ferðamála tekur þó ekki með neinum hætti yfir ábyrgð og skyldur stjórnvalda eða hagsmunasamtaka greinarinnar.

Tilgangur hins nýstofnaða félags er að halda utan um starfsmannamál og almennan rekstur Stjórnstöðvar ferðamála. Starfsmenn félagsins skulu sinna þeim verkefnum sem þeim eru falin af Stjórnstöð ferðamála í samræmi við Vegvísi í ferðaþjónustu sem iðnaðar- og viðskiptaráðherra og Samtök ferðaþjónustunnar gáfu út í október 2015.