Prince átti að hitta lækni vegna verkjalyfjafíknar daginn eftir að hann lést

Tónlistarmaðurinn Prince, sem lést óvænt á sumardaginn fyrsta 57 ára að aldri, átti að hitta lækni daginn eftir að hann lést vegna verkjalyfjafíknar. Frá þessu greinir blaðið Star Tribune í Minneapolis, heimaborg Prince, í dag.

Lögmaður læknisins Howard Kornfeld, sem rekur meðferðarheimili í Kalíforníu og þykir sérfræðingur í meðferð við ópíatafíkn, segir að fulltrúar Prince hafi haft samband við Kornfeld nóttina áður en tónlistarmaðurinn lést og sagt að hann þyrfti bráðnauðsynlega á læknisaðstoð að halda.

Kornfeld gat ekki flogið til Minnesota-ríkis strax daginn eftir til að hitta Prince sökum anna. Hann sendi son sinn í sinn stað en til stóð að Kornfeld færi degi síðar. Aldrei varð þó úr því.

Andrew Kornfeld, sonur Howard, var einn þriggja sem fundu lík Prince í lyftu í Paisley Park, upptökuveri og húsnæði Prince, og var sá sem hringdi fyrst í neyðarlínuna.

Ekki er vitað að svo stöddu hvað dró Prince til dauða. Til stendur að birta niðurstöður krufningar hans á næstu vikum.