Tekjur Apple dragast saman

Tæknirisinn Apple hefur boðað 13 prósenta samdrátt á tekjum sínum á öðrum fjórðungi reikningsárs fyrirtækisins. Er þessi samdráttur rakinn til minni sölu á iPhone-símum. Er þetta í fyrsta sinn frá árinu 2003 sem salan hjá Apple dregst saman.

Eru tekjur fyrirtækisins á þessum öðrum ársfjórðungi sagðar nema 50 milljörðum Bandaríkjadollara, samanborið við 58 milljarða Bandaríkjadollara á sama tíma í fyrra. Apple seldi 51,2 milljónir iPhone-síma á öðrum ársfjórðungi þessa reikningsárs en á sama tíma í fyrra seldi fyrirtækið 61,2 milljónir síma.

Salan í Kína var dræm og dróst saman um 26 prósent, að því er fram kemur á vef fréttastofu breska ríkisútvarpsins BBC. Tim Cook, forstjóri Apple, segir fyrirtækið hafa staðið sig vel andspænis efnahagslegum mótbyr. Hagnaður fyrirtækisins fór úr 13,5 milljörðum Bandaríkjadala frá sama tímabili í fyrra í 10,5 milljarða í ár.