Veiðisvæðin kennd við ION opnuðu í gær

Veiðisvæðið sem er gjarnan kennt við ION hótelið opnaði í gær en um er að ræða eitt gjöfulasta stórurriðasvæði í heiminum.

Það eru engar ýkjur að segja að þetta magnaða svæði sé eitt besta stórurriðasvæði á heimsvísu og þetta geta þeir sem veiða svæðið staðfest.  Svæðið nær yfir tvö svæði í Þingvallavatni en þau eru Ölfusvatnsásós og Þorsteinsvík.  Mikil veiði er á báðum þessum svæðum og stærðin á urriðanum þarna getur náð hátt í 30 pund og þessir risar sjást oft  vel stutt frá landi en eru að sama skapi ljónstyggir.

Veiðin hófst þarna í gær og byrjaði afskaplega vel enda aðstæður ágætar.  Ekki liggja fyrir tölur um nákvæman fjölda fiska en eins og myndirnar sem fylgja fréttinni bera með sér þá virðist mest af urriðanum sem veiddist í gær vera 8-12 pund en það skal þó ekkert fullyrt hvort einhverjir stærri hafi slæðst með.  Veiðimönnum sem hafa áhuga á að veiða þetta svæði þarf að hryggja með þeim fréttum að uppselt er á það fyrir þetta tímabil og það þarf þá að leggja inn bókanir fyrir rímabilið 2017 til að eiga séns á að veiða á þessu vinsæla svæði.