Sigurjón kveður Bylgjuna og færir sig yfir á Hringbraut

Sigurjón M. Egilsson hefur verið ráðinn ritstjóri allra miðla Hringbrautar en hann hefur um árabil stýrt þættinum Sprengisandi á Bylgjunni.

Í samtali við Vísi segir Sigurjón að Sprengisandur verði því ekki aftur á dagskrá á Bylgjunni í umsjón hans en hann mun verða með umræðuþátt í sjónvarpi Hringbrautar sem einnig verður útvarpað á rásinni FM89,1.

„Umræður verða auknar á Hringbraut enda er full þörf á því núna þar sem miklar hræringar eru í stjórnmálunum,“ segir Sigurjón.

Í tilkynningu frá Hringbraut segir að á því rúma ári sem sjónvarp Hringbrautar hefur starfað hafi verið stígandi í áhorfi og sá árangur gefi því tækifæri til að eflast enn frekar.