Sigmundur hættir við komu á ársfund atvinnulífsins

Sigmundur Davíð Gunnlaugsson, sem í gær steig til hliðar sem forsætisráðherra, mun ekki ávarpa ársfund atvinnulífsins sem haldinn verður í Hörpu á morgun.

Fundurinn er á vegum Samtaka atvinnulífsins (SA) og ber yfirskriftina Fíllinn í herberginu og leitin að peningastefnunni.

Til stóð að Sigmundur ávarpaði fundinn ásamt þeim Björgólfi Jóhannssyni, formanni SA, og Má Guðmundssyni seðlabankastjóra.

Þorsteinn Víglundsson, framkvæmdastjóri SA, staðfesti í samtali við fréttastofu rétt í þessu að Sigmundur Davíð mun ekki taka til máls líkt og auglýst var.