Hættir á toppnum

Þegar ég ýtti á „publish“ á síðustu færslunni þá fór ég að gráta. Þetta var spennufall, þetta er búið að vera svo stór hluti af lífi mínu undanfarin ár en nú tekur nýtt við,“ segir Erna Hrund Hermannsdóttir sem hefur haldið úti einu vinsælasta lífsstílsbloggi landsins undanfarin ár. Erna hefur nú ákveðið að kveðja bloggið í bili og skrifaði sína síðustu bloggfærslu á Trendnet.is í vikunni. Erna byrjaði að blogga árið 2011. Vinsældir hennar í netheimum jukust hratt og segir hún margt hafa breyst frá því hún hóf bloggferilinn.

Færslur Ernu hafa vakið mikla athygli og í fyrra heimsóttu 150 þúsund notendur síðuna hennar. Það var því ekki auðveld ákvörðun að hætta með síðuna. „Mér finnst ég vera hætta á toppnum. Ég hef alltaf sagt að þegar mér færi að finnast þetta leiðinlegt eða kvöð þá myndi ég hætta. Ég var ekki komin á þann stað, bloggið var mjög vinsælt og mér fannst þetta enn gaman. Þetta var margþætt ákvörðun, bæði vegna þess að ég er komin í nýja vinnu þannig að ég hef minni tíma og svo fannst mér líka bara vera kominn tími á nýjar áskoranir, ný tækifæri og ný ævintýri,“ segir Erna, sem er orðin vörumerkjastjóri sérvöru hjá Ölgerðinni.

Þrátt fyrir að henni hafi fundist skemmtilegt að halda blogginu úti þá neitar hún því ekki að það hafi tekið frá henni talsverðan tíma. Hún taki þetta alla leið og geri hlutina vel. Hún hélt einnig úti vinsælum Snapchat-aðgangi sem hún hefur einnig lokað. „Maðurinn minn er feginn því hann þarf ekki lengur að taka myndir af mér í hvert skipti sem við förum út að borða,“ segir hún hlæjandi. „Mér hefur alltaf fundist þetta ótrúlega skemmtilegt en fann að það var kominn tími til að breyta til. Mér fannst ég frjáls þegar ég var búin að taka þessa ákvörðun og langar eiginlega bara að hverfa í smá tíma núna.“

Hún hefur líka fengið sinn skerf af gagnrýni en segist ekki hafa tekið það inn á sig. „Þetta var stundum alltof mikil athygli en ég vandist því mjög hratt. Það var leiðinlegt að fá neikvæða athygli en það fylgir þegar maður gefur færi á sér. Mér fannst samt leiðinlegt þegar fólk ákvað að ég væri svo merkileg með mig eða eitthvað slíkt. Samfélagið þrífst svo oft á neikvæðni og að tala niður til fólks. Ég fann að þetta var farið að hafa áhrif á mig og bloggið ­þannig að ég ákvað að að hætta hlusta á þetta, reyna að vera jákvæðari og hrósa. Ég er líka bara venjuleg tveggja barna móðir sem nennir ekki að taka til,“ segir hún hlæjandi.

Erna hefur mest skrifað um snyrtivörur en hún hefur þó einnig leyft fólki að fylgjast með sínu persónulega lífi og skrifað um hluti sem hafa verið hálfgerð tabú. „Ég ákvað að nota bloggið til þess að koma af stað ákveðnum umræðuefnum í samfélaginu. Ég sá tækifæri til þess að breyta einhverju. Tala um fæðingarþunglyndi, fósturlát og slit eftir barnsburð,“ segir hún en síðastnefnda færslan vakti mikla athygli. „Fólk er enn að stoppa mig úti á götu og þakka mér fyrir að hafa talað um þetta. Það vildi enginn tala um þessa hluti en í kjölfarið varð mikil umræða og vitundarvakning gagnvart þessu.“

Erna segist vera þakklát fyrir reynsluna og tækifærin sem hún hafi fengið undanfarin ár. „Þetta hefur verið ótrúleg reynsla og ég hef fengið mikið af samböndum í gegnum þetta.“ Hún segir líklegt að það komi yfir hana mikil bloggþörf einhvern tíma. „Þá hendi ég bara í rosalega langan Facebook- status,“ segir hún hlæjandi og bætir við: „Svo er aldrei að vita nema mig langi að fara aftur að blogga eftir 20 ár og þá bara geri ég það.“