Málsókn gegn Björgólfi vísað frá dómi

Máli málsóknarfélags gegn Björgólfi Thor Björgólfssyni var vísað frá í Héraðsdómi Reykjavíkur í gærmorgun.

Málið var höfðað eftir að Vilhjálmur Bjarnason, þingmaður Sjálfstæðisflokksins, Samtök sparifjáreigenda og lífeyrissjóðurinn Stapi auglýstu eftir þátttakendum í hópmálsókn gegn Björgólfi Thor Björgólfssyni með heilsíðuauglýsingum í blöðum. Þeir sem stóðu að málinu voru hluthafar í Landsbankanum þegar hann féll í október 2008. Í október 2015 voru þátttakendur í hópmálsókninni orðnir 207 og vonast var til að fleiri bættust við.

Jóhannes Bjarni Björnsson, lögmaður á Lögmannsstofunni Landslögum, rak málið fyrir hönd þeirra. Þeir sem standa að málsókninni töldu að rannsókn og gagnaöflun hefðu leitt til þess að fram væru komin gögn sem gæfu sterklega til kynna að Björgólfur Thor hefði með saknæmum hætti komið í veg fyrir að hluthafar fengju upplýsingar um umfangsmiklar og líklega ólögmætar lánveitingar tengdar Björgólfi. Þá hafi einnig verið brotið gegn reglum um yfirtökuskyldu.