Óvæntir afgangar vinsælir

Tónlistarmaðurinn Kendrick Lamar kom öllum að óvörum fyrir helgi þegar hann gaf án nokkurs fyrirvara út nýja plötu stafrænt. Platan ber nafnið Untitled Unmastered og inniheldur átta lög sem rapparinn hefur unnið að síðustu þrjú ár. Öll lög nema eitt voru tilbúin áður en hann gaf út breiðskífuna To pimp a butterfly sem Rolling Stone magazine valdi bestu plötu síðasta árs. Síðan á föstudag hefur platan fengið rúmlega 2 milljónir spilana á Spotify.

Þrátt fyrir að vera einhvers konar afgangs-, mylsnu- eða viðbótarplata frá útgáfunni frá því í fyrra eru fyrstu viðbrögð gagnrýnanda þau að hér sé um nokkuð heildstæða plötu að ræða. Hún er töluvert styttri en breiðskífurnar tvær sem komu á undan en hljómur og frágangur á lögunum er aldrei á þann veg að hlustandinn fái það á tilfinninguna að hér sé verið að bjóða upp á einhverjar prufuupptökur. Það er þó þvert á þau skilaboð sem listamaðurinn póstaði sjálfur á twitter-síðu sinni þar sem hann sagði að lögin væru borin fram hrá og ókláruð.

Allur frágangur í kringum umslag plötunnar minnir þónokkuð á þriðju breiðskífu Sigur Rósar sem eins og margir muna hét "( )" og er oftast kölluð „svigaplatan“ í daglegu tali. Eins og þar eru lögin tæknilega ónefnd. Á lagalista kemur fram orðið „ótitlað“ og svo dagsetning sem skilur hlustandann eftir með þá spurningu hvort þar sé átt við hvenær lagið var samið eða klárað?

Sama djass-ský umleikur tónlist nýju plötunnar og þá síðustu og á henni er töluvert um gestagang. Þar má nefna Cee-Loo Green, Adrian Younge og Ali Shaheed úr Tribe called Quest. Upptökustjórinn Swizz Beatz, sem er giftur söngkonunni Aliciu Keys, heldur því fram að sonur þeirra hafi séð um forritun á einu laganna á plötunni sem er merkilegt fyrir þær sakir að hann er aðeins fimm ára.