Birna íhugar stöðu sína

Birna Einarsdóttir, bankastjóri Íslandsbanka, mun íhuga stöðu sína hjá bankanum nú þegar hann er kominn í ríkiseigu, ef kjör hennar munu breytast. Þetta kom fram á uppgjörsfundi Íslandsbanka í gær. „Það á eftir að koma í ljós þegar hlutirnir skýrast betur og ég hef því ekki tekið neina ákvörðun. Það á einnig eftir að koma í ljós hvaða áherslur nýr eigandi vill setja í rekstrinum,“ segir Birna. Hún lét þess þó getið á fundinum að þrátt fyrir launalækkun yrði hún þó með töluvert há laun miðað við aðra starfsmenn.

Líkur eru á að laun bankastjórans muni lækka töluvert nú þegar bankinn er í ríkiseigu og launin ákvörðuð af kjararáði. Laun Birnu heyra ekki undir kjararáð núna og voru 44 milljónir, eða um 3,76 milljónir á mánuði í fyrra samkvæmt upplýsingum úr ársreikningi. Auk þess fékk hún 7,2 milljónir króna í árangurstengda greiðslu.

Til samanburðar eru núverandi laun Steinþórs Pálssonar, bankastjóra Landsbankans, 1,64 milljónir á mánuði og fær hann ekki árangurstengdar greiðslur.

Fram kom einnig á fundinum að framkvæmdastjórn bankans vonar að bankinn verði ekki lengi í eigu ríkisins. Starfsfólk bankans líti á eignarhald ríkisins sem tímabundið. Þetta sé meðal annars vegna þess að bankinn hafi nánast alltaf verið í einkaeigu og þannig hafi menning bankans tekið mið af því.

Hagnaður Íslandsbanka eftir skatta var 20,6 milljarðar á síðasta ári, samanborið við 22,7 milljarða króna árið 2014. Í tilkynningu segir að munurinn liggi að stærstu leyti í einskiptisliðum og styrkingu íslensku krónunnar. Arðsemi eigin fjár var 10,8 prósent samanborið við 12,8 prósent árið 2014.

Grunnrekstur hefur haldið áfram að styrkjast, en hagnaður af reglulegri starfsemi var 16,2 milljarðar króna samanborið við 14,8 milljarða króna á sama tíma 2014. Útibúum Íslandsbanka hefur fækkað úr tuttugu og sex í sautján milli áranna 2011 og 2015, og stefnt er að því að þau verði fimmtán í árslok 2016.

Íslandsbanki skuldbatt sig til að greiða 378 milljónir króna á síðasta ári, eða 20 milljónum meira en árið áður, vegna bónusa til starfsmanna bankans og dótturfélaga þess. Þau svör fengust frá Íslandsbanka um þetta að Íslandsbanki hefur notast við kaupaukakerfi frá árinu 2013 og fylgir reglum Fjármálaeftirlitsins um kaupaukakerfi fjármálafyrirtækja.