Síðasti markaðurinn einnig sá stærsti

Síðasti markaður með greiðslumark mjólkur varð jafnframt sá stærsti frá upphafi. Alls var 2,7 milljóna lítra kvóti keyptur fyrir tæplega 555 milljónir króna. Síðasti uppboðsmarkaður fór fram í september en þá voru 1,6 milljónir lítra keyptar fyrir 390 milljónir.

Athygli vekur að 69 buðu fram sölu á greiðslumarki. Til viðbótar við þær 2,7 milljónir lítra sem seldust var 3,2 milljóna lítra greiðslumark sem seldist ekki.

Samkvæmt breytingum á búvörulögum tekur við innlausnarskylda ríkisins á greiðslumarki á næstu þremur árum. Miðað er við að innlausnarverðið á komandi ári verði 140 krónur á hvern lítra. Það lækkar niður í 111 krónur á lítra árið 2018.

Fréttin birtist fyrst í Fréttablaðinu.