Sögusagnir um iPhone 7 teknar saman

Tæknirisinn Apple mun halda viðburð þann 7. september. Sem svo oft áður hefur fyrirtækið ekki sagt frá því hvað standi til, en líklegast verða iPhone 7 og 7 Plus kynntir til leiks, sem og nýtt Apple Watch.

Apple hefur ekki tekist að koma í veg fyrir umtalsverða leka varðandi iPhone 7 en sé mark takandi á þeim lekum verður ekki mikil breyting á milli sex og sjö.

Líklegustu eiginleikar símanna:

• Tveir símar. Einn 4,7 tommur og hinn 5,5
• Svipaðir iPhone 6 í útliti
• Litir: Silfur, grár, gull og rauður/gull
• Betri örgjörvi
• Engin innstunga fyrir heyrnartól
• Þrýstiskynjari í Home takkanum
• Aukið þol gagnvart vatni
• Tveggja linsu myndavél á iPhone 7 Plus

Tveggja linsu myndavélar eiga að bjóða upp á aukna skerpu í myndum sem og aukna dýpt. Með því að fjarlægja innstunguna fyrir heyrnartól er Apple sagt vilja hvetja framleiðendur heyrnartóla til að nýta innstungu símanna fyrir hleðslutæki einnig fyrir heyrnartól. Þá verður líklega hægt að hlusta á tónlist með Bluetooth.

Á næsta ári, tíu ára afmæli iPhone, stendur til að kynna iPhone 8.

Þar glímir Apple hins vegar við ákveðinn vanda. iPhone 7 verður líklega ekki það frábrugðinn iPhone 6, en iPhone 8 er talinn vera töluvert frábrugðinn fyrri símum. Meðal annars er talið að Home takkinn muni hverfa, síminn verði þynnri og með ávölum skjá.

Þá er einnig talið að síminn sjálfur verði ekki úr áli, heldur gleri.

Þeir sem uppfæra í iPhone 7 á þessu ári, eru ekki líklegir til að kaupa sér svo annann síma á næsta ári.