Moody´s hækkar lánshæfiseinkunn ríkissjóðs Íslands í A-flokk

Lánshæfismatsfyrirtækið Moody‘s Investor Service tilkynnti fyrr í dag að ákveðið hefði verið að hækka lánshæfiseinkunn ríkissjóðs um tvö þrep, úr Baa2 í A3, með stöðugum horfum. Frá þessu er greint á vef fjármálaráðuneytisins en þar segir að svo mikil hækkun í einu lagi sé sjaldgæf en Moody‘s segi að það endurspegli hraðan og víðtækan framgang í endurreisn Íslands eftir fall bankakerfisins haustið 2008.

Moody‘s tilkynnti í júní síðastliðnum að það hefði ákveðið að endurmeta Baa2 lánshæfiseinkunn ríkissjóðs Íslands með hækkun í huga. Í tilkynningunni kom fram að stjórnvöld hefðu náð umtalsverðum árangri við að snúa efnahagslífinu, fjármálakerfinu og opinberum fjármálum á sjálfbæra braut. Þá kom fram að einn lykilþáttur til skoðunar við mat á hækkun lánshæfiseinkunnar væri hvort ný fjármálastefna og fjármálaáætlun ríkisstjórnarinnar fyrir hið opinbera, ásamt endur· bótum sem gerðar hafa verið á skattakerfinu, muni bæta sjálfbærni opinberra skulda til meðallangs tíma.

Sjá nánar á vef fjármálaráðuneytisins hér. 

Seðlabanki Íslands hefur birt lauslega þýðingu á frétt Moody´s frá því í dag á vef sínum sem lesa má hér.