Heildarlaun hækkað um þriðjung

Árið 2015 námu heildarlaun einstaklinga 837,9 milljörðum króna, samanborið við 624,1 milljarð króna árið 2010. Á fimm árum hafa heildarlaun því hækkað um 34,3 prósent. En á sama tíma hefur fjöldi framteljanda einungis aukist um 3,1 prósent. Þetta kemur fram í Staðtölum skatta sem birt voru á vef ríkisskattstjóra í síðustu viku.

Heildarlaun hafa tekið kipp síðustu árin og hækkuðu meðal annars um 7 prósent eða 54,6 milljarða milli 2014 og 2015. Heildartekjur einstaklinga hafa hækkað úr 827 milljörðum árið 2010 í 1,11 milljarð árið 2015, eða um 33 prósent, samtímis því að framteljendum fjölgaði um fjögur prósent.

Á tímabilinu jukust greiðslur úr lífeyrissjóðum úr 91,8 milljarði í 105,5 milljarða, eða um 14,9 á sama tíma að framteljendum fjölgaði um tæplega sjö þúsund, eða um 15 prósent. Því hafa greiðslur úr lífeyrissjóðum ekki hækkað í takt við hækkun launa í landinu.

Heildar tekjuskattur hefur hækkað verulega á tímabilinu eða um 37 prósent, úr 213,7 milljörðum í 293,4 milljarða. Almennur tekjuskattur hefur aukist úr 87,9 milljörðum króna árið 2009 í 117,5 milljarða króna árið 2015 á sama tíma og framteljurum hefur fjölgað um 10 þúsund manns.

Tekjur af húsaleigubótum, aðstoð og styrkjum hækkuðu rúmlega tvöfalt á tímabilinu úr 1,8 milljarði í 3,7 milljarða. Tekjur af styrkjum vegna náms og vísindastarfa hækkuðu einnig úr 1,5 milljarði í 2,4 milljarða á tímabilinu.

Tekjur erlendis frá drógust aftur á móti saman úr 607 milljónum króna í 483 milljónir króna. Tekjur af atvinnuleysisbótum fækkaði aftur á móti um helming úr 20,5 milljörðum árið 2010 í 10,7 milljarða árið 2015, samtímis þess að framteljurum atvinnuleysisbóta fækkaði um ríflega helming.