Guðjón nýr samskiptastjóri Öryrkjabandalagsins

Guðjón Helgason hefur verið ráðinn nýr samskiptastjóri Örykjabandalags Íslands. Hann hefur um árabil starfað sem fréttamaður frá árinu 2002, síðast á fréttastofu RÚV.

Guðjón kveðst afar spenntur fyrir því að fá að takast á við þetta krefjandi og áhugaverða verkefni. Helstu verkefni hans munu snúa að útgáfumálum, viðburðum, samskiptum við fjölmiðla og upplýsingamiðlun hvers konar.

Hann lauk BA námi í stjórnmálafræði frá Háskóla Íslands 2002 og meistaranámi í alþjóðasamskiptum frá Háskólanum í Essex á Englandi 2005.

Í tilkynningu frá ÖBÍ segir að um nýtt starf sé að ræða sem sé ætlað að efla starf ÖBÍ enn frekar. Hagvangur hafði umsjón með ráðningarferlinu en yfir 50 umsóknir bárust um starfið.

Öryrkjabandalag Íslands er hagsmuna- og mannréttindasamtök fatlaðs fólks, langveikra, örorkulífeyrisþega og aðstandenda þeirra. Aðildarfélög ÖBÍ eru 41 talsins og telja þau um 29 þúsund félagsmenn.