Þingheimur fylgist náið með þróun Schengen

Staða Schengen samstarfsins í ljósi flóttamannavanda Evrópu var til umræðu á sameiginlegum fundi utanríkismálanefndar og allsherjarnefndar Alþingis í morgun. Formaður utanríkismálanefndar segir að öllum aðilum Schengen sé fullljóst að samstarfið sé í miklum vanda.

„Ég held að allir séu sammála um það að ástandð er þungt, ástandið er erfitt og sumir myndu segja að það geti brugðið til beggja hvað varðar áframhaldandi samstarf. Við erum að sjá ríki, sjáum það síðast með Danmörku í síðustu viku, þar sem ríki grípa til ákveðinna aðgerða sjálf til að bregðast við.“

Erfitt fyrir lítið ríki að standa eitt

Hjá framkvæmdastjórn Evrópusambandsins hefur komið til álita að gera hlé til allt að tveggja ára á þeirri hlið Schengen samstarfsins sem snýr að opnum landamærum. Hanna Birna leggur þó áherslu á að fleiri hagsmunir felist í Schengen.

„Það hefur allavega verið mín skoðun að kostirnir séu mun fleiri en gallarnir. Og ég held að það sé meirihluta afstaða, bæði hjá stjórnvöldum og líka hér á þinginu. Við vorum líka að fara yfir það hér í morgun hvað myndi gerast ef við myndum ganga út úr þessu. Ég held að við gleymum því stundum að það myndi skapa mjög erfitt ástand fyrir lítið ríki, sem hefði þá engan aðgang að alþjóðlegum upplýsingum og gagnabönkum. Þannig að málið yrði miklu snúnara."

Nýju útlendingalögin á leið á þingið

Óttarr Proppé tekur undir að samstaða sé meðal þingmanna almennt um mikilvægi þess að bjarga Schengen.

„Já ég skynja það nú og ég held það sé mjög mikilvægt fyrir okkur, við erum náttúrulega bæði lítið ríki og á mörkum þessa Schengen samstarfs. Þetta samstarf skiptir okkur mjög miklu máli og það er mjög mikilvægt fyrir okkur í raun og veru að það sé að virka.“

Frumvarp til nýrra útlendingalaga, sem Óttarr stýrði vinnu að, er væntanlegt fyrir þingið á næstu vikum og má búast við því að það verðir rætt með hliðsjón af hraðri þróun mála í Evrópu.

„Við höfum verið að skoða þessi útlendingamál heildstætt hjá okkur. Þannig að við erum auðvitað líka á Íslandi að reyna að uppfæra okkur, skulum við segja, og þá þurfum við að fylgjast vel með því hvað aðrir eru að gera, þannig að við séum ekki á skjön við það."