Vilja opna Laundromat í efnalaug á Laugarásvegi

Eigandi kaffihússins Laundromat við Austurstræti hefur fest kaup á húsnæði á Laugarásvegi í Reykjavík þar sem til stendur að opna nýjan stað. Athygli vekur að húsnæðið hýsti áður efnalaugina Kötlu til margra ára en Laundromat-keðjan, sem telur þrjá staði í Kaupmannahöfn og einn í Reykjavík, er þekkt fyrir að bjóða upp á aðstöðu fyrir viðskiptavini til að þvo af sér föt.

„Það er svosem skemmtilegt að halda áfram með þannig starfsemi í húsinu, það er svona ákveðin tenging,“ segir Jóhann Friðrik Haraldsson, eigandi staðarins á Íslandi. „En við erum samt sem áður að koma með nýjar vélar. Það var gömul strauvél sem við vorum að hugsa um að nota í „decor“ en svo fór að hún var látin víkja.“

Líkt og mbl.is greindi frá fyrr í dag, er búið að sækja um framkvæmdaleyfi og vonast Jóhann til þess að hægt sé að opna í júní. Hann segir staðsetningar í Hafnarfirði, Grafarvogi og Breiðholti meðal annars hafa komið til greina og að það verði ábyggilega tekið til skoðunar að opna fleiri staði ef reksturinn í Laugardalnum gengur vel.

„Frekar en að vera með aðra miðbæjarstaðsetningu, þá ákváðum við að opna í úthverfi og byrja í smærra húsnæði en við erum með núna,“ segir Jóhann. „Þetta er samt svipað húsnæði, á tveimur hæðum. Það verður þvottahús og barnahorn í kjallara og eldhús, bar og sæti á jarðhæð.“

Jóhann tók við rekstrinum í desember í 2013 en félagið sem áður hafði séð um reksturinn, Laundromat Reykjavík ehf., var stuttu síðar tekið til gjaldþrotaskipta.

„Reksturinn sem slíkur hefur alltaf svosem staðið undir sér,“ segir Jóhann. „Þeir sem áttu þetta voru í öðrum rekstri líka og það var kannski það sem sligaði reksturinn.“