Íslandsbanki opnar útibú á Granda

Íslandsbanki opnaði í dag nýtt útibú á Fiskislóð 10 á Granda. Þar sameinast útibúin í Lækjargötu og Eiðistorgi.

Sameinað útibú á að þjóna sama svæði og útibúin á Eiðistorgi og Lækjargötu hafa þjónustað hingað til en 23 starfsmenn starfa í útibúinu.

Una Steinsdóttir, framkvæmdastjóri Viðskiptabankasviðs Íslandsbanka segir í tilkynningu: „Verslun og þjónusta miðbæjarins hefur verið að færast til vesturs með aukinni uppbyggingu atvinnulífs í vesturbænum. Hönnunin á nýju útibúi tekur mið af þeim krafti og nýbreytni sem einkennir svæðið á Granda. Við viljum vera þátttakendur í þeirri uppbyggingu og því var þessi staðsetning fyrir valinu. Útibúið er öflugt að stærð og eitt af stærri fyrirtækjaútibúum Íslandsbanka. Sameining útibúanna endurspeglar þá stefnu bankans að auka hagkvæmni en efla þjónustu um leið. Með nýju útibúi erum við að svara kalli viðskiptavina sem í auknum mæli kalla eftir sérhæfðri ráðgjöf en kjósa sjálfsafgreiðslu við einfaldari færslur.“