Fjármálaeftirlitið skoðar stærstu lán bankanna

Fjármálaeftirlitið hefur kannað stærstu ný útlán Íslandsbanka, Landsbankans og MP banka árið 2014.  Könnun fór þannig fram að Fjármálaeftirlitið fékk lista yfir öll útlán bankanna þriggja sem voru yfir 100 milljónum króna á síðasta ári og valdi nokkur lán til nánari skoðunar.

Alvarlegasta athugasemdin var gerð vegna þess að lán Íslandsbanka var veitt þrátt fyrir að áreiðanleikakönnun hafi ekki verið í samræmi við starfsreglur bankans. Fjármálaeftirlitið fór fram á að bankinn framkvæmdi að nýju áreiðanleikakönnun fyrir lögaðilann og sendi eftirlitinu afrit. Fjármálaeftirlitið gerði athugasemd við að Íslandsbanki sendi eftirlitinu ófullnægjandi gögn í kjölfar gagnabeiðni Fjármálaeftirlitsins. Fjármálaeftirlitið kannaði einnig tvö lán til viðbótar hjá Íslandsbanka sem reyndust vera í samræmi við lánareglur bankans. Öll lánin voru yfir einum milljarði króna.

Hjá Landsbankanum kannaði Fjármálaeftirlitið frekar lánveitingar til  þriggja aðila sem námu samtals 1,9 milljarði króna til nánari skoðunar. Eftirlitið gerði athugasemd við að bankinn hefði ekki farið eftir eigin verklagsreglu varðandi mat á lánshæfi eins viðskiptavinar bankans.

Fjármálaeftirlitið kannaði einnig tvö lán hjá MP banka sem samtals námu 900 milljónum króna. Lánin þóttu vera í samræmi við lánareglur bankans. Þó var gerð athugasemd við að ákvörðun stjórnar bankans um að samþykkja lánsbeiðni milli funda hefði ekki komið skýrt fram í næstu fundargerð hennar en um var að ræða lán sem stjórn bankans bar að veita samþykki fyrir samkvæmt útlánareglum bankans.