Tæp 50% kaupa í matinn hjá Hagkaupi og Bónus

Árið 2014 voru starfandi tæplega 180 dagvöruverslanir á Íslandi. Velta verslananna vegna sölu á dagvöru er áætluð um 130 milljarðar króna á árinu. Þetta kemur fram í nýrri skýrslu Samkeppniseftirlitsins um stöðu á dagvörumarkaði.

Hlutdeild Haga er um 48–49% en fyrirtækið rak árið 2014 alls 41 dagvöruverslun. Af verslanakeðjum var Bónus með hæstu hlutdeildina eða 38–39%. Hlutdeild Kaupáss var um 19–20% en þar af var hlutdeild Krónunnar 15–16%. Samkaup voru með 15–16% hlutdeild en þar af var hlutur Nettó 8-9% af heildarmarkaði. 10-11/Iceland var með 5–6%. Aðrar dagvöruverslanir sem hafa nokkra markaðshlutdeild eru Fjarðarkaup og Víðir en hlutdeild þeirra var á bilinu 1–3%.

Samkeppniseftirlitið segir að heldur hafi dregið úr markaðshlutdeild Haga frá árinu 2009. Hlutur minni verslana hafi á sama tíma aukist.