Skattar hækkuðu um 59 milljarða: Viðskiptaráð vill draga úr umsvifum hins opinbera

Viðskiptaráð Íslands hvetur til þess að stjórnvöld dragi úr umsvifum hins opinbera, sérstaklega í ljósi þess að Seðlabankinn spáir þenslu hérlendis á næstu árum. Í ríkisreikningi fjársýslunnar fyrir árið 2014 kemur fram að skatttekjur ríkissjóðs jukust um 59 milljarða á milli ára.

Þá er einnig gerð athugasemd við það að launakostnaður ríkisins jókst um sex prósent á milli ára og önnur rekstrargjöld ríkisins um fjögur prósent. Útgjöld ríkissjóðs jukust samtals um sautján milljarða króna á milli ára og segir í tilkynningu frá Viðskiptaráði að aðhaldi í ríkisfjármálum virðist vera lokið í bili.

Sjá einnig: 46,4 milljarða króna tekjuafgangur af ríkissjóði

„Það mun seint teljast sjálfbær þróun að auka ríkisútgjöld á sama tíma og opinberar skuldir eru tvisvar til þrisvar sinnum hærri en hjá öðrum Norðurlöndum og hækkandi meðalaldur reynist Íslendingum sífellt þyngri baggi,“ segir í tilkynningunni.

„Að mati Viðskiptaráðs eru fjölmörg verkefni á höndum hins opinbera í dag sem einkaaðilar eru betur til þess fallnir að leysa af hendi. Það getur hvort heldur verið í formi aukins einkarekstrar eða minni aðkomu hins opinbera á ákveðnum sviðum.“