Kaupþing á 28 prósent upp í kröfur

Bókfært virði eigna Kaupþings nam 799,8 milljörðum króna í árslok 2014. Útstandandi kröfur nema hins vegar 2825,6 milljörðum króna. Eignir nema því rétt rúmlega 28 prósentum af kröfum. Kröfuhafafundur var haldinn í gær þar sem niðurstaðan var kynnt. 

Vísir greindi frá því á dögunum að eignir slitabús Glitnis banka nema tæplega 963 milljörðum íslenskra króna en kröfurnar nema 2.271 milljarði króna. Búið á því um það bil 42 prósent upp í kröfur.

Í tilkynningu frá Kaupþingi kemur fram að eignir Kaupþings jukust um 21,7 milljarða á liðnu ári eða um 2,8 prósent. Því til viðbótar voru í árslok, 19,2 milljarðar króna geymdir á vörslureikning til að mæta umdeildum seint framkomnum forgangskröfum. Mælt í evrum jókst verðmæti eignasafnsins um 275 milljónir eða um 5,6% á árinu.



Heildarfjárhæð útistandandi krafna í kröfuskrá lækkaði um 53,7 milljarða á árinu og nam 2.825,6 milljörðum króna í árslok. Ástæður þessarar lækkunar má að mestu leyti rekja til úrlausna ágreiningsmála. Heildarfjárhæð samþykktra krafna í kröfuskrá hækkaði um 10,6 milljarða á árinu og nam 2.814,1 milljarði króna í árslok.

Handbært fé Kaupþings nemur um 401,7 milljörðum króna sambanborið við 418,6 milljörðum í lok árs 2013.