Netauglýsingar velta nú meiru en sjónvarpsauglýsingar

Velta netauglýsinga er orðin meiri en velta sjónvarpsauglýsinga ef marka má skiptingu veltu PIPAR\MEDIA eftir auglýsingamiðlum. Einungis eru þrjú ár síðan velta netauglýsinga hjá fyrirtækinu nam aðeins 7% af heildarveltu. Þetta kemur fram í fréttabréfi auglýsingastofunnar Pipar\TBWA.

Dagblöð eru enn stærsti miðilinn með 29 prósent veltunnar Þar á eftir koma netmiðlar með 26 prósent veltu og sjónvarpsauglýsingar með 23 prósent veltu. Morgunblaðið greindi fyrst frá málinu.

Í fréttabréfinu eru sagðar líkur á því að netauglýsingar muni taka fram úr blaðaauglýsingum á þessu ári. Ísland sé enn langt á eftir nágrannalöndum í þessum efnum. Svíar búist við að hlutfall stafrænna auglýsinga verði 47% á árinu, Danir 43% og Norðmenn 40%.