Auglýsir eftir hressum ömmum í vinnu

Gísli Matthías Auðunson, eigandi veitingastaðanna Matur og drykkur á Granda og Slippsins í Vestmannaeyjum, auglýsir eftir eldri konum í starf um helgar á Facebook síðu sinni.

„Við á Mat og Drykk erum að leita eftir af tveimur aðilum í teymið okkar. Skilyrðin eru að þær séu konur eldri en 60 ára, hafi gaman að íslenskum mat og drykk og geta unnið aðra hverja helgi frá 10.30 - 14.30. Þekkir þú hressa ömmu sem vantar örlitla aukavinnu og langar að hafa gaman. Vinnandi með fullt af flottum fagmönnum á Mat og Drykk?” skrifar Gísli.

Gísli segir málið ekki tengjast beint inn í umræðuna um atvinnuleysi meðal eldra fólks. „Við erum samt þeirrar skoðunar að það sé skrítið að fleiri nýti sér ekki reynslu eldra fólks í hinum ýmsu verkum.“

Sextugir eiga erfitt með að fá vinnu aftur

Atvinnumál sextugra og eldri voru rædd á Alþingi 15. október síðastliðinn og þar kom fram í máli Eyglóar Harðardóttur velferðarráðherra að í aldurshópnum 55-74 ára sé atvinnuþátttaka minnst. En hún mælist um 65 prósent. Þrátt fyrir þetta er þó jákvætt að atvinnuþátttaka þessa hóps er hæst hér á landi ef litið er á Vesturlöndin í heild.

„Þeir sem missa vinnuna um sextugt, einhverra hluta vegna, eiga erfitt með að fá aftur starf,“ sagði Erna Indriðadóttir þingmaður Samfylkingarinnar sem hóf umræðuna. „Ég hef rætt við fjölda kvenna og karla um sextugt og jafnvel yngri sem fá ekki vinnu þótt þau séu í fullu fjöri. Þess eru dæmi að fólk hafi sótt um, ég hef séð lista yfir umsóknir þar sem viðkomandi hafði sótt um 80 störf, hvaða störf sem er en ekki einu sinni verið boðaður í viðtal þótt hann hafi haft góða menntun og langa starfsreynslu.“

Gísli segist kunna að meta eldri þjóna þegar hann sjálfur fer út að borða en að það sé afar sjaldgæft hér á landi en algengara erlendis. Hann segist verða var við að eldra fólk sé oft með mun meira sjálfstraust, hafi meiri þekkingu og „veit algjörlega um hvað það er að tala.“

Vilja skapa sér sérstöðu

Veitingastaðurinn býður upp á brunch eða dögurð um helgar. „Í raun finnst okkur eitthvað vanta í dögurðinn sem er um helgar. Okkur langar að skera okkur úr hópi þeirra sem bjóða upp á dögurð og langar hreinlega eins og að það sé eins og koma í mat til ömmu um helgar að koma til okkar. Við kokkarnir sem vinnum á Mat og drykk vitum bara ákveðið mikið um gamaldags íslenska matargerð svo það verður rosalega fróðlegt að sjá hvað kemur út úr þessu.“

Það hefur verið tekið vel í verkefnið hjá Gísla og félögum hingað til. En er verkefnið tímabundið eða til frambúðar? „Það á í raun bara eftir að koma í ljós! Vegna þess hversu vel hefur verið tekið í þetta værum við alveg til í að bæta í einhverjum fleirum ef áhugi væri fyrir því.“

Þær konur sem áhuga hafa á starfinu geta enn sótt um og sent ferilskrá á info@maturogdrykkur.is.