Borgarbúar hvattir til að „skamma sig ekki“

Borgarbúar margir hverjir hafa eflaust orðið varir við listaverk sem trónir á toppi byggingakrana við Frakkastíg. Ljósasería á krananum myndar orðin „Ekki skamma þig“ en með orðunum hvetur listamaðurinn fólk til að hætta að vera svo hart við sjálft sig og þess í stað njóta lífsins.

Listamaðurinn, sem vill ekki láta nafni síns getið þessa stundina, segir setninguna hafa verið tekna úr nokkuð óþekktu lagi eftir Egil Sæbjörnsson. Hún sé vel við hæfi því Íslendingar séu gjarnir á að rífa sig niður. Þá sé hún jafnframt hluti af „Ég er ekki tabú“ herferðinni. „Ljósin eiga að lýsa upp skammdegið og gleðja fólk.“

Listamaðurinn segir aðsókn að listasýningum dræma og því hafi hann leitast eftir því að finna hugmyndir um hvernig hægt væri að koma listinni til fólksins. Hugmyndin hafi sprottð í sumar og þá hafi verið ráðist í útfærslu á verkinu, í samvinnu við Ístak.