Fengu 50 þúsund króna lán til að byggja einbýlishús

Fyrsta opinbera íbúðalánið sem gefið var út hér á landi nam 50 þúsund krónum og var veitt til byggingar einbýlishúss í smáíbúðahverfinu. Lánið var veitt árið 1955 og var til 25 ára með 7 prósent föstum óverðtryggðum vöxtum. Húsnæðismálastofnun, sem þá var nýbúið að koma á laggirnar, veitti lánið en á þessum tíma bjó stór hluti landsmanna enn í torfbæjum og bröggum.

Í dag er þess minnst að 60 ár eru liðin frá því að þetta fyrsta íbúðalán var veitt en nú er það Íbúðalánasjóður sem gegnir hlutverki opinbers lánveitanda til húsnæðiskaupa. Sjóðurinn varð til með lögum sem sett voru árið 1998 en í dag veita bankar og lífeyrissjóðir einnig húsnæðislán. Ólíkt fjármálastofnunum ber Íbúðalánasjóði skylda til að veita öllum húsnæðislán sem uppfylla lögbundin skilyrði.

Sérstök 60 ára afmælishátíð fer fram í dag á milli kl. 14-16 í Gamla bíói. Á þriðja hundrað manns hafa boðað komu sína en fundurinn er öllum opinn. Fjallað verður um íslenska húsnæðisstefnu síðustu sex áratuga og horft til framtíðar.