Ólöglærð lagði LÍN

Héraðsdómur Reykjavíkur hefur vísað frá dómi máli Lánasjóðs íslenskra námsmanna gegn lántakanda og umboðsmanni hans vegna vanreifunar lánasjóðsins á kröfugerð. LÍN krafðist þess að fólkið myndi sameiginlega greiða 4,4 milljónir auk dráttarvaxta vegna láns sem tekið var árið 2007, og allan málskostnað.

Á lágmarks örorkulífeyri

Stefndu eru bæði ólöglærð en fluttu málið sjálf. Lántakandinn er kona sem sótti um lán vegna flugnáms í Bandaríkjunum árið 2007. Hún veiktist illa árið 2012 og var henni því veitt undanþága til eins árs frá föstum afborgunum. Henni láðist að sækja um aðra þágu fyrir tilsettan tíma og var undanþágu beiðni hennar því hafnað af stjórn LÍN.

Konan segir veikindin hafa versnað árið 2013 sem hafi valdið því að hún hafi ekki haft rænu á að sækja um aðra undanþágu frá greiðslu gjalddaga, samkvæmt reglum lánasjóðsins. Hún hafi talið víst að undanþága frá greiðslu gilti svo lengi sem aðstæður hefðu ekki breyst til batnaðar. Greiðsluvilji hennar hafi verið og sé einlægur en algjörlega óraunhæfur þar sem hún hafi engar aðrar tekjur en lágmarks örorkulífeyri. Eins og þekkt sé „dragi maður ekki tennur úr tannlausri kellingu“.

Enginn samningsvilji

Hún sagði LÍN ekki hafa sýnt nokkurn samningsvilja og að þrátt fyrir ítrekaðar tilraunir til að ná samkomulagi hafi viðbrögð sjóðsins verið þrákelkni og neikvæð. Hún fór því fram á að málinu yrði vísað frá dómi. Ýmsir annmarkar væru á kröfugerð lánasjóðsins, til að mynda hafi þar hvergi verið að finna sundurliðaða fjárhæð heildarskuldarinnar og því ógerlegt að sannreyna kröfu sjóðsins. Á það féllst dómurinn. Vanreifun hafi verið á kröfugerð lánasjóðsins sem valdi því að viðhlítandi vörnum verði ekki komið við að hálfu konunnar. Þá var LÍN gert að greiða konunni og ábyrgðarmanni hennar 400 þúsund krónur í málskostnað.