Auðunn Blöndal „snappar“ frá Las Vegas

Eins og flestum ætti að vera kunnugt mætir bardagakappinn Gunnar Nelson hinum bandaríska Brandon Thatch í búrinu á MGM Grand hótelinu í Las Vegas á laugardaginn.

Fjölmargir Íslendingar eru komnir til Vegas til að fylgjast með bardaganum, þar á meðal sjónvarpsmaðurinn Auðunn Blöndal. Hann er þar við tökur á þætti um Gunnar sem sýndur verður á Stöð 2 næsta vetur.

Auddi hefur tekið yfir Nova-snappið og ætlar að gefa forvitnum innsýn inn í lífið í Las Vegas en hann verður að sjálfsögðu vopnaður símanum á bardaganum sjálfum á laugardaginn.

Hægt er að fylgjast með Audda undir notendanafninu #novaisland á Snapchat en þess má að lokum geta að bardaginn verður í beinni útsendingu á Stöð 2 Sport.