Ísland í þriðja sæti eftir höggleikinn

Ísland stendur ágætlega að vígi eftir að keppni í höggleik lauk í 2. deild EM landsliða sem nú stendur yfir í Póllandi.

Ísland endaði í þriðja sæti í höggleiknum en fjórar efstu þjóðirnar munu nú keppast um að komast upp í 1. deildina. Nú tekur við holukeppni þar sem keppt verður í bæði fjórmenningi og tvímenningi.

Haraldur Franklín Magnús lék best íslensku kylfinganna í höggleiknum en hann endaði í 5.-8. sæti á einu höggi undir pari. Rúnar Arnórsson lék á einu höggi yfir pari og Guðmundur Ágúst Kristjánsson tveimur yfir pari. Kristján Þór Einarsson og Axel Bóasson léku báðir á fjórum höggum yfir pari en Axel Bóasson á níu höggum yfir pari.

Ísland er á samtals níu höggum yfir pari í liðakeppninni en Noregur (-8) og Austurríki (-4) eru í efstu tveimur sætunum. Portúgal er einnig á níu höggum yfir pari og komst áfram í lokahluta mótsins.

Íslenska kvennalandsliðið keppir einnig á EM landsliða en þar er keppt í einni deild. Konurnar eru í nítjánda sæti af 21 þjóð á samtals 60 höggum yfir pari. Sunna Víðisdóttir er með bestan árangur einstaklinganna en hún lék á pari fyrstu tvo dagana og er í 13.-17. sæti.