Kristján tekur við af Ragnheiði

Stjórn Krabbameinsfélags Íslands hefur ráðið Kristján Oddsson yfirlækni og sviðsstjóra leitarstöðvar Krabbameinsfélagsins til að gegna einnig starfi forstjóra félagsins þar til ný stjórn tekur ákvörðun um næsta forstjóra. Það verður gert að loknum aðalfundi félagsins næsta vor.

Eins og Vísir hefur greint frá sagði Ragnheiður Haraldsdóttir, forstjóri Krabbameinsfélagsins síðastliðin sex ár, starfi sínu lausu á dögunum. Sömuleiðis hættu Jón Gunnlaugur Jónassson, yfirlæknir krabbameinsskrárinnar, og Sandra Sif Morthens markaðsstjóri störfum. Jón Gunnlaugur tekur við starfi sem yfirlæknir á Landspítalanum.

Engin illindi

Ragnheiður þvertekur fyrir að um einhver illindi sé að ræða innanhúss sem útskýri brotthvörf þeirra þriggja.

„Það er alls ekki þannig, þetta eru bara eðlileg umskipti á 50 manna vinnustað og ekkert annað um að vera,“ segir hún. „Ég fer héðan einstaklega ánægð með allt samstarf hér og hef notið næstum hverrar stundar í þessu starfi.“

Ragnheiður mun áfram starfa með samtökum norrænna krabbameinsfélaga þar sem hún gegnir formennsku.

Ragnheiður þakklát

Í tilkynningu frá Krabbameinsfélaginu í dag segist Ragnheiður ánægjulegt að nú þegar hún láti af störfum sem forstjóri Krabbameinsfélagsins standi félagið traustum fótum bæði faglega og fjárhagslega.

„Á undanförnum árum hefur okkur tekist í samvinnu við starfsfólk og velunnara félagsins að efla og treysta starfsemi Krabbameinsfélagsins. Í dag er starfsemi þess þróttmikil og fer vaxandi og við finnum að almenningur ber traust til okkar og þeirrar þjónustu sem við veitum. Fyrir það er ég þakklát,“ segir Ragnheiður Haraldsdóttir.

Kristján Oddsson tók við sem yfirlæknir og sviðsstjóri Leitarstöðvar Krabbameinsfélagsins í apríl 2013, en áður starfaði hann sem heimilislæknir víða um land og rak stofu sem kvensjúkdómalæknir. Hann vann einnig hjá Landlæknisembættinu í rúm fjögur ár, meðal annars sem aðstoðarlandlæknir.

Störf í boði

Á sjötta tug umsókna hafa borist um starf markaðsstjóra hjá félaginu og starf yfirmanns krabbameinsskrár verður sömuleiðis auglýst á næstunni. Jón Gunnlaugur og Sandra gegndu fyrrnefndum stöðum. Þá verður starf fjármálastjóra væntanlega auglýst til umsóknar að því er segir í tilkynningunni.

„Um leið og stjórn Krabbameinsfélagsins þakkar góðu samstarfsfólki sem senn hverfur til annarra starfa fyrir störf þeirra í þágu félagsins, hlakkar hún til að fá nýtt og öflugt fagfólk til liðs við Krabbameinsfélagið,“ segir í tilkynningunni.